Xaçmazdan olan jurnalist Cəmil Məmmədlinin barəsindəki hökmdən verilən apellyasiya şikayəti üzrə məhkəmə iclasının vaxtı məlum olub. Bu haqda ShimalNews 27 may tarixində xəbər verir.
Məlumata görə, Sumqayıt Apellyasiya Məhkəməsində keçiriləcək ilkin hazırlıq iclası mayın 29-na təyin edilib. Şikayət hakim Ruhiyyə Əsgərovanın sədrliyi ilə araşdırılacaq.
Cari ilin aprel ayında hakim Fəhmin Hümbətovun sədrliyi ilə keçirilən prosesdə hökm oxunmuşdur. Cəmil Məmmədli 6 il 2 ay müddətinə azadlıqdan məhrum edilmişdir.
Ona qarşı Cinayət Məcəlləsinin 178.2.4 (dələduzluq-xeyli miqdarda ziyan vurmaqla törədildikdə), 182.2.1 (hədə-qorxu ilə tələb etmə – qabaqcadan əlbir olan bir qrup şəxs tərəfindən törədildikdə) 182.2.2 (təkrar hədə-qorxu ilə tələb etmə) və 221.2.2-ci ( xuliqanlıq) maddələri ilə ittiham irəli sürülüb.
Daha öncə prokurorun ittihamların sübuta yetirildiyini qeyd edərək, onun 8 il 3 ay müddətinə azadlıqdan məhrum edilmə tələbini irəli sürdüyü haqda xəbər vermişdik.
