Nabranda müasir idman meydançaları inşa olunur. Bu barədə ShimalNews 18 aprel tarixində Xaçmaz RİH-yə istinadən məlumat verir.
AFFA-nın və Futbolun İnkişafı Fondunun nümayəndələri Xaçmaza səfər ediblər. Görüşdə icra başçısı Elnur Rzayev, AFFA-nın İnfrastruktur üzrə direktoru Fuad Cəfərov, FİF-nin icraçı direktoru Tural Piriyev, “Səbail” klubunun Müşahidə Şurasının sədri Əbdülqəni Nurməmmədov və üzvü İxtiyar Asyabi iştirak ediblər.
Onlar turizm məkanı olan Nabran qəsəbəsində yeni idman meydançalarının inşası istiqamətində görüləcək işlərlə bağlı fikir mübadiləsi aparıblar. Rayon rəhbərliyi idman meydançalarının inşasını müsbət dəyərləndirib. Səfər zamanı “Səbail”in rəsmiləri baş sponsor ASCO-nun dəstəyi ilə inşa edilən stadionlara baş çəkiblər.
Müasir tələblərə cavab verən təlim-məşq bazası uşaq futbolunun inkişaf etdirilməsi üçün müvafiq yaş qruplarına aid komandaların istifadəsinə veriləcək. Eyni zamanda bazadan müxtəlif yaş qruplarından ibarət Azərbaycan milli komandaları da təmənnasız istifadə edə biləcəklər.
