Xaçmazda məktəbli daşlanıb. Bu haqda ShimalNews 7 mart tarixində “Bizim.Media”ya istinadən məlumat verir.
Hadisə rayonun Çiləgir kənd orta məktəbində baş verib. 8-ci sinif şagirdi Sahib Həsənovun idman meydançasında təsadüfən atdığı daş digər məktəbli Rəsul Yağmurova dəyib.
9-cu sinif şagirdi üz nahiyəsindən xəsarət alıb. O, Rayon Mərkəzi Xəstəxanasına yerləşdirilib.
Məsələ ilə bağlı şagirdin atası Məmməd Yağmurov bildirib ki, hadisə dərs zamanı baş verib. Lakin oğluna məktəb rəhbərliyi tərəfindən təcili tibbi yardım çağırılmadığını qeyd edib. Ata bildirib ki, oğlunun həm sinif rəhbəri, həm də məktəb direktoru Vüsalə Yusifli hadisənin baş verməsi ilə bağlı nə ona vaxtında məlumat verib, nə ilkin tibbi yardım göstərib, nə də təcili yardım çağırıblar.
Məmməd Yağmurov hüquq-mühafizə orqanlarına da müraciət edəcəyini bildirib.
Quba-Xaçmaz Regional Təhsil İdarəsinin mətbuat katibi Gülər Hüseynova isə baş verən hadisədən xəbərdar olduqlarını və araşdırma getdiyini qeyd edib.
Araşdırma aparılır.
