Qubadan olan millət vəkili Vahid Əhmədov intizam məsuliyyətinə cəlb ediləcək. Bu haqda ShimalNews 25 aprel tarixində Qafqazinfo-ya istinadən məlumat verir.
Həmkarları deputatı müxalifətçi blogerə müsahibəsində səsləndirdiyi fikirlərə görə qınayıb, ölkədə aparılan sosial-iqtisadi islahatlara kölgə salmaqda ittiham ediblər. Müzakirələrdən sonra Vahid Əhmədov İntizam Komissiyasına verilib. Bunu deputatların təklifindən sonra Milli Məclisin spikeri Sahibə Qafarova təsdiqləyib.
“Həmişə dövlətimin yanında olmuşam, dövlətimin mövqeyini müdafiə etmişəm, yenə də edirəm. İstər Milli Məclis, istərsə də mətbuatdakı çıxışların hansı mövqedə olduğu bəllidir. Bu çıxışların haradan idarə olunduğunu dəqiq bilirəm. Kim bu göstərişi verib, onu da bilirəm. Vaxtı gələndə bunun hamısı açılacaq. Fəzail Ağamalı təklif etdi ki, İntizam Komissiyasında baxılsın. Etiraz etmirəm, baxılsın. Orada da bütün suallara cavab verməyə hazıram. Millətinin və dövlətinin yanında olan insanam”, - deyə Vahid Əhmədov bugünkü iclasda deyib.
