Quba rayonu Qarovulüstü kənd ibtidai məktəbinin tək şagirdi Gülyaz Sultanovadır. Bu haqda ShimalNews 24 yanvar tarixində "AzVision"a istinadən məlumat verir.
Qızcığazın müəllimi Ülviyyə Məmmədovadır. O, 2023-cü ildə MİQ imtahanı vasitəsilə bura müddətli müqavilə ilə gəlib. Lakin məktəbdə tək şagird olmasından xəbəri yox idi.
"Dərs dediyim Gülyaz əslində 3-cü sinifdə oxumalıdır, onun 9 yaşı var. Sadəcə mənim bilmədiyim səbəblərdən vaxtında dərsə getməyi alınmayıb, keçən il hazırlıq qrupunda, bu il isə 1-ci sinifdədir. Kənddə ibtidai sinif yaşında olan 6 uşaq var ki, onlardan 2-si hazırlıq sinifləridir və onlar qonşu kəndə gedirlər. Gülyazı isə səhhətinə görə göndərməyiblər. Ümumiyyətlə, bu məktəbdə 3 ildir ki, tək şagird təhsil alır. Əgər Gülyaz da qonşu kəndə oxumağa göndərilsəydi, bu məktəb çoxdan bağlanacaqdı", - deyə Ü.Məmmədova bildirib.
Tək şagird olmasına baxmayaraq, müəllimi Gülyaz üçün təhsili əyləncəli etməyə çalışır. Bəzən qruplarla keçirilməli olan məşğələ üçün Ülviyyə xanım şagird obrazına girir.
