Şimal bölgəsində yay mövsümü yağıntılı və rütubətli keçməsi bir çox sahələrə ziyan vursa da, arıçılığa müsbət təsir göstərib.
Baku TV-nin məlumatına görə, bu il arıxanalarda bol məhsul əldə olunub. Hazırda bal süzümü həyata keçirilir.
“14 ildir bu təsərrüfatla məşğulam. Əsas təsərrüfat, birinci böyük təsərrüfatdır, 2 bölmə təsərrüfat yaratmışam burda. Təsərrüfatda burda maksimum həm ana yetişdirmə, həm xarici sort yetişdirmə həmdəki sırf bal 3 yerə bölünüb. Təsərrüfat ümumiyyətlə sərin olanda daha məhsuldarlığı çox olur. Hər cür burda balların fərqliklər çoxdur. Çeşidlər çoxdur, balların dadında fərq çoxdur. Ötən il balaca yeşiklərimiz 6 kilo veribsə, bu il 18 kilo verib. Ötən il böyük yeşiklərimiz 20 kilo veribsə, bu il 40-45, hətta 60 kilo verib”, - deyə Xaçmazda arıçılıqla məşğul olan Elvin Abdıyev bildirib.
Xaçmazla yanaşı Qubada da bal süzümünün qızğın çağıdır. Arıçılar aylardır çəkdiyi zəhmətin bəhrəsini indi görür. Hazırda balın kiloqramı alıcılara 30-50 manat civarında təklif edilir:
“Ötən il vabşe bar olmuyub. Bu il çox gözəl məhsul oldu. Burdaki möhürlü bal hamısı 70%-i kəklik otunun balıdır. 30%-i dağ çökəsi deyirik. Onun çox böyük fərqi olur. 35 manata da verirəm, dağ balı verirəm 40-a”, - deyə Faiq Bayramlı bildirib.
Arıçı Zəfər Əzizovun sözlərinə görə isə saxta bal satanlar satışa mane olurlar. Onlar 15-20 manata bal təklif edirlər. Bu isə mümkün deyil.
Bal süzümündən dərhal sonra arıçıları xeyli iş gözləyir. Pətəklərin qış ehtiyatı gecikdirilmədən təmin edilməli və dərmanlarla profilaktik tədbirlər görülməlidir.
