Şimal bölgəsində yanğınlara qarşı qabaqlayıcı tədbirlərin səmərəliliyinin artırılması məqsədilə regional müşavirə keçirilib. Bu haqda ShimalNews 24 may tarixində məlumat verir.
Tədbir Quba rayon Heydər Əliyev Mərkəzində Ekologiya və Təbii Sərvətlər Nazirliyinin, Fövqəladə Hallar Nazirliyinin və Quba Rayon İcra Hakimiyyətinin birgə təşkilatçılığı ilə baş tutub.
Müşavirədə Quba Rayon İcra Hakimiyyətinin başçısı İlqar Mahmudov, Ekologiya və Təbii Sərvətlər nazirinin müavini Vüqar Kərimov, Fövqəladə Hallar Nazirinin baş yanğın təhlükəsizliyi eksperti, daxili xidmət general-mayoru Yusif Nəbiyev, aidiyyəti üzrə mərkəzi icra hakimiyyəti orqanlarının, eləcə də Quba, Abşeron, Xaçmaz, Qusar, Şabran, Siyəzən rayon, həmçinin Sumqayıt şəhər yerli icra hakimiyyəti və hüquq-mühafizə orqanlarının, habelə inzibati ərazi dairəsi üzrə nümayəndəliklərinin və bələdiyyələrin nümayəndələri iştirak ediblər.
Natiqlər bildiriblər ki, yanğın hadisələrinin sayında müşahidə olunan artımın başlıca səbəbi insan faktorudur. Külli miqdarda maddi ziyanla nəticələnən yanğın hadisələrinin qarşısının alınması üçün preventiv tədbirlərin görülməsi vacibdir.
Daha sonra bu halların qarşısının alınmasına, eləcə də baş verən yanğın hadisələrinə vaxtında müdaxilə olunmasına dair təkliflər irəli sürülüb.
