Su ehtiyatlarının Quba, Qusar, Xaçmaz, Şabran, Siyəzən və Xızı rayonları arasında hazırda suvarılması tələb olunan mövcud əkin sahələrinə uyğun bölüşdürülməsi barədə qərar qəbul edilib. Bu haqda ShimalNews 21 aprel tarixində Azərbaycan Meliorasiya və Su Təsərrüfatına (AMST) istinadən məlumat verir.
Görüşdə qeyd olunan rayonların əkin sahələrinin su təminatında yaranan çətinliklər müzakirə edilib. Su təminatı ilə məşğul olan qurumlara mövcud su ehtiyatları, su təminatı imkanları və gözlənilən risklər barədə su istifadəçilərinin qabaqcadan məlumatlandırılması, sudan səmərəli və qənaətlə istifadə, su itkilərinin azaldılması, suvarmanın düzgün təşkili və sudan istifadəyə nəzarətin gücləndirilməsi ilə bağlı müvafiq tapşırıqlar verilib.
Tədbirdə “AMST” ASC-nin sədr müavini Zakir Quliyev, suvarma suyunun düzgün bölüşdürülməsi ilə bağlı kənd təsərrüfatı nazirinin müavini Sarvan Cəfərov, “Azərsu” ASC-nin birinci müavini Teyyub Cabbarov və qeyd olunan rayonların icra başçıları, yerli istismar idarələrinin rəhbərləri və yerli DAİM-lər iştirak ediblər.
