Quba-Xaçmaz Regional Təhsil İdarəsinin müdiri Rüfət Hacıyev istefa verib. Bu barədə ShimalNews 28 noyabr tarixində xəbər verir.
Bu gün R.Hacıyev “Facebook” sosial şəbəkəsində öz müraciətini dərc edib:
“Əziz dostlar,
Dəyərli təhsil işçiləri,
Ölkəmizdə son onillikdə həyata keçirilən təhsil islahatlarının həyata keçirilməsi prosesində daim nazirliyimizin və siz əziz həmkarlarımın dəstəyi üzərimdə olub. Bu illər ərzində daim nazirliyimizin prinsiplərinə uyğun addım atmışam. Bütün qazandığımız uğurlar və region təhsilində həyata keçirilmiş inkişafyönümlü tədbirlər məhz sizlərin iradəsi və dəstəyi sayəsində mümkün olmuşdur. Bu uzun və şərəfli yolda məhz sizlərlə birgə addımlamışam və sizlərin ictimai rəyi mənə stimul verib. Bütün bunlara rəğmən mən bir fərd olaraq, çox yorulmuşam və estafeti digərlərinə ötürməyin vaxtının çatdığını düşünürəm. Bu gün vəzifəmdən ayrılıram, lakin bütün vücudumla sizlərlə birgə nazirliyimizin təhsil siyasətini dəstəkləməkdə davam edəcəyəm. Bir daha hamınıza təşəkkür edirəm və bir təhsil işçisi olaraq sizlərin yanındayam”.
Daha öncə məktəblinin Rüfət Hacıyev tərəfindən döyülməsi sosial şəbəkələrdə və ictimaiyyətdə geniş müzakirələrə səbəb olmuşdur.
