Bölgəmizin istehsalında lider olduğu almanın güzəştli sığortalanması mümkündür. Bu haqda ShimalNews 12 mart tarixində xəbər verir.
Alma Azərbaycandan ən çox ixrac olunan, ölkəyə böyük gəlir gətirən meyvələrdəndir. Onun intensiv və superintensiv bağlarının 96%-i məhz Quba-Xaçmaz bölgəsindədir. Təkcə Quba rayonunda 11.600 ha, Qusarda 4.300 ha, Xaçmaz rayonunda isə 2.600 ha sahədə bu meyvə əkilir. İsmayıllı da alma yetişdirilməsinə görə seçilən rayonlardandır.
Alma ağacları üçün əsas risklər - dolu, fırtına, qasırğa, şaxtavurma, müxtəlif növ zərərvericilər və bitki xəstəlikləridir. Dövlət dəstəyi ilə mart və aprel aylarında sığorta mexanizmindən yararlanmaq mümkündür.
Bu zaman məbləğin 50%-i fermerlərin əvəzinə ödənilir. Məsələn, Quba-Xaçmaz regionunda 1000 manatlıq alma məhsulunu baza sığorta zərfi ilə sığortalamaq fermerə cəmi 18,4 manata başa gəlir. Meyvə bağlarının geniş yayıldığı Mərkəzi Aran regionunda (Göyçay, Ağdaş, Kürdəmir və sair) bu rəqəm 16,5 manat, Dağlıq Şirvan regionunda isə (İsmayıllı, Şamaxı və sair) 22 manat təşkil edir.
Daha geniş məlumatı Aqrar Sığorta Fondunun 1651 çağrı mərkəzinə müraciət etməklə, eləcə də Fondun www.asf.gov.az rəsmi internet səhifəsi və səhifədəki “Sığorta kalkulyatoru” vasitəsilə əldə etmək olar.
