Qusar rayonunda ailə münaqişəsi zəminində qadın ərinə xəsarət yetirib. Bu haqda ShimalNews 24 may tarixində “Demokrat.az”-a istinadən məlumat verir.
Hadisəni törədən 48 yaşlı Tamaranın barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib. O, özünü təqsirli bilib.
Hadisə günorta radələrində baş verib. Yaşadığı evə sərxoş vəziyyətdə gəlmiş Tehranın yoldaşı Tamara ilə aralarında mübahisə yaşanıb. Qadın ağac parçası ilə bir neçə dəfə kişinin kürək nahiyəsinə vurub:
“Daha sonra arxadan onu itələdikdə sol qaşüstü nahiyəsi şüşəbəndin qapı çərçivəsinə dəyməsi nəticəsində xəsarət aldı. Hazırda törətdiyim əməldən səmimi peşmanlıq hissi keçirmişəm”, – deyə qadın bildirib.
Qusar Rayon Məhkəməsi təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb. Tamaranın barəsində olan cinayət təqibinə xitam verilib və o, cinayət məsuliyyətindən azad edilib.
