Qusarda arvadını döyərək öldürməkdə təqsirləndirilən Zedik Əlifxanovun cinayət işi üzrə məhkəmə istintaqı başa çatıb. Bu haqda ShimalNews 7 mart tarixində “Pravda.az”a istinadən məlumat verir.
Məhkəmənin hökmü ilə hadisəni törədən şəxs 9 il müddətinə azadlıqdan məhrum edilib.
Qətlin 2022-ci il sentaybrın 6-da baş verdiyi haqda xəbər vermişdik. 27 yaşlı Ellada Əlifxanova yaşadığı evdə ölü tapılmışdır. Onun 37 yaşlı həyat yoldaşı Zedik Əlifxanov isə könüllü polisə təslim olmuşdur.
İttihamda qeyd edilib ki, Zedik ailəsinin kredit borclarını ödəmək üçün Elladaya zəruri kodları və şəxsiyyət vəsiqəsinə dair məlumatları bir vərəqdə yazmasını deyib. Sonra kağızı götürüb, ödəniş etmək üçün “eManat” elektron ödəmə terminalına gedib. Orada bir neçə dəfə pul köçürməyə cəhd etsə də, heç nə alınmayıb. Həmin məlumatların arvadı tərəfindən düzgün yazılmadığını başa düşən Zedik yaşadığı evə qayıdıb. Arvadına ona verdiyi məlumatları düzgün yazmadığını irad tutaraq, həmin an sərxoş vəziyyətdə olaraq mübahisə etməyə başlayıb. Ellada ondan həmin vərəqi alıb, bir müddət sonra isə bütün məlumatları düzgün yazdığını bildirməklə ona başqa vərəq qaytarıb. Zedik ikinci dəfə verilən vərəqin fərqli olduğunu görüb. Yerdə olan ağac çubuqla qadına bədəninin müxtəlif nahiyələrindən bir neçə dəfə, ayağına isə təpik zərbələri vurub.
Nəticədə xəsarət alan qadın 05 sentyabr 2022-ci il tarixdən 06 sentyabr 2022-ci il tarixə keçən gecə təxminən 02:00 radələrində yaşadıqları evdə yataq otağında ölüb.
