Qusar rayon İcra Hakimiyyətinin başçısı Şair Alxasov vətəndaşlarla görüşüb. Bu haqda ShimalNews 19 yanvar tarixində məlumat verir.
Tədbir rayonun Çubuqlu kəndində baş tutub. Burada hüquq-mühafizə orqanlarının, bir sıra idarə və müəssisələrin rəhbərləri də iştirak ediblər.
Sakinlər, ilk növbədə qazlaşdırılma, istismara yararsız elektrik dirəklərinin və naqillərinin yenilənməsi, internet şəbəkəyə qoşulma, yollarla bağlı məsələləri səsləndiriblər.
Görüşdə Xaçmaz Regional Enerji Təchizatı və Satışı İdarəsinin rəisi Taleh Səfərov iştirak edib. O bildirib ki, Çubuqlu və Ləgərqışlaq kəndlərinin fasiləsiz və dayanıqlı elektrik enerjisi ilə təmin olunması üçün mövcud nöqsanlar qısa vaxt ərzində aradan qaldırılacaq, layihəyə əsasən, elektrik enerjinin verilişində Xaçmaz rayonundan olan asılılıq aradan götürüləcək, ümumilikdə kəndlərin elektrik sistemləri yenidən qurulacaq.
Kəndlilər tərəfindən qaldırılan digər məsələlərə müvafiq izahat verilmiş, qaldırılan problemlərin həlli üçün əlaqədar idarə və təşkilat rəhbərlərinə tapşırıqlar verilmişdir.
