Qubanın Çiçi kənd tam orta məktəbi hələ də qəzalı vəziyyətdədir. Bu barədə ShimalNews 22 sentyabr tarixində “ARB”yə istinadən xəbər verir.
Hazırda məktəbdə 107 şagird təhsil alır. Onlar deyirlər ki, yaxşı şəraitdə təhsil almaq istəyirlər. Lakin burada divarlar çat verib, hətta aralanıb. Bina hər an uşaqların üzərlərinə uça bilər.
Məsələni ShimalNews daim diqqətdə saxlayır. Məsələ ilə bağlı Quba Təhsil Sektorundan 3 ay öncə bildirilmişdir ki, yeni binanın tikintisi gələcək illərdə nəzərdə tutulub.
Eyni cavab 2022-ci ildə təhsil ocağının vəziyyəti gündəmə gətiriləndə də verilmişdi. Yeni məktəb binası tikilənə qədər binanın qəzalı hissələri mühafizə olunaraq şagirdlərin təhlükəsizliyinin təmin ediləcəyi deyilmişdi.
