Quba rayonunda gəlinini qətlə yetirməkdə təqsirli bilinən qayınananın cinayət işi üzrə təfərrüatlar məlum olub. Bu barədə ShimalNews 14 aprel tarixində Ölkə.az-a istinadən məlumat verir.
Hadisə rayonun Vəlvələ kəndində baş verib. 50 yaşlı Rəhilə Əliyeva evində münaqişə zəminində gəlini Nazilə Ağarzayevanı kəmərlə boğaraq qətlə yetirib. Qatil Quba Rayon Polis Şöbəsinin əməkdaşları tərəfindən saxlanılıb.
Faktla bağlı Rəhilə Əliyeva rayon prokurorluğunda ifadə verib. O bildirib ki, oğlu İlqar Bakıda Nazilə ilə tanış olub və evlənib. Gəlin onlarla yaşadığı dövrdə heç bir səbəb olmadan qayınana, qızları və oğlu ilə dava edib, ləyaqatlərini alçaldıb.
Bir neçə dəfə Nazilə Ağarzayeva qayınanasını döydüyünə görə məhkəmə tərəfindən cərimə ilə cəzalandırılıb.
Sentyabrın 8-i axşam saat 21:00 radələrində Nazilə evə gəlib qapıya təpiklə vurub, Rəhilə və qızlarının ünvanına söyüşlər söyərək yaşadığı otağın qapısının açarını istəyib. Ona açarların onun özündə olduğu bildirilib. N.Ağarzayeva bundan sonra öz otağının qapısına da bir neçə dəfə təpiklə zərbələr vurub. Bunu görən Rəhilə gəlinindən qapını sındırmamağı xahiş edəndə Nazilə təpiklə onun qarnından vuraraq, "pozğun küçə qadını" adlandırıb.
Gəlininin davaya meyilli olmağını bilən Rəhilə ona cavab qaytarmayıb. Həyətə çıxdıqdan az sonra Nazilə yenə evə daxil olub, onun "qızları ilə birlikdə pozğunluqla məşğul olduğunu" deyərək təhqir edib.
Rəhilə artıq buna dözə bilməyib və gəlinini saçlarından tutub və dartıb. Bir neçə dəfə bədəninin müxtəlif nahiyələrindən dişləyib və boğmağa başlayıb. Nazilə yerə yıxılıb, çantasından bıçaq götürüb. Bunu görən R.Əliyeva ayağı ilə onun silah olan qolunu basıb, yerə sıxıb.
Daha sonra Rəhilə əynindəki paltarın belindəki kəmərini açıb, Nazilənin boğazına sarıyıb və sıxıb. Bir neçə dəqiqə belə vəziyyətdə saxladıqdan sonra isə kəməri buraxıb və mərhumun üstündən qalxaraq həyətə çıxıb.
R.Əliyeva bildirib ki, təxminən 15 dəqiqə həyətdə dayanıb, öz gələcəyini fikirləşərək ağlayıb. Özünə gəldikdən sonra könüllü olaraq polisə getmək qərarına gəlib.
Məhkəmədə Rəhilə ittiham üzrə özünü qismən təqsirli bilib. Ona 11 il 3 ay iş kəsilib.
[caption id="attachment_39749" align="alignnone" width="640"]
Foto açıq mənbələrdən[/caption]
[caption id="attachment_39748" align="alignnone" width="640"]
Foto açıq mənbələrdən[/caption]
