Qubada çaydanın lüləyinə görə qadına qarşı xuliqanlıq edən şəxs cinayət məsuliyyətinə cəlb edilib. Bu haqda ShimalNews 19 yanvar tarixində “Publika.az”a istinadən məlumat verir.
Hadisə törədən 46 yaşlı Elvin Abduləzizov (adlar şərtidir) sərxoş halda çay evinə gəldiyini danışıb:
“Axşam saatlarında Timiryazev qəsəbəsindəki “480” adlı çay evinə gedib, 5-6 bakal pivə qəbul eləmişdim. Sonra çay sifariş etdim. Bu zaman Nəzirə stola yaxınlaşıb çayniki masanın üzərinə qoydu, çaynikin lüləsini mənə tərəf çevirdi. Mən də Nəzirəyə: “çaynikin lüləsini mənə tərəf qoyma”,- dedim. Nəzirə heç nə demədən masadan uzaqlaşıb getdi. Həmin gün axşam saatlarında çay evini işlədən Aynur adlı xanıma "whatsap"la ismarıc yazıb, bundan sonra mənə Nəzirənin deyil, Ayan adlı işçinin qulluq eləməsini dedim. Bundan 1 gün sonra yenidən çay evinə getdim, 2-3 bakal pivə içdim, bir qədər oturduqdan sonra tanımadığım şəxslərin təklifinə əsasən, onların masasına əyləşdim, onlarla spirtli içki qəbul etdim. Həmin gün saat 17 radələrində işim olduğundan kafedən çıxıb getdim. Bir qədər keçdikdən sonra Aynur mənimlə əlaqə saxlayaraq bayaq yanında oturduğum şəxslərin hesabını mənim ödəməli olacağımı deyərək getdiklərini bildirdi. 15-20 dəqiqə sonra həmin çay evinə qayıtdım. Bir qədər sonra Nəzirə çay gətirdi, çayniki masanın üzərinə qoydu, lüləsini yenə də mənə tərəf çevirdi. Nəzirədən: “çayı Ayanın gətirməyini istəmişdim. Sən niyə mənim stoluma qulluq edirsən?”- deyə soruşdum. O da cavabında: “Ayan başqa stola baxır, ona görə mən qulluq edirəm”,- dedi. Ona: “dünən sənə demişdim axı çaynikin lüləsini mənə tərəf qoyma”,- dedim. Nəzirə da qışqırıb: “mən vorzakon deyiləm, avtoritet deyiləm, mən nə bilim çayniki sən tərəfə qoymaq nə deməkdir”,- dedi”.
Bundan sonra tərəflər arasında münaqişə olub və çoxsaylı müştərilərin gözü qarşısında Elvin masadakı külqabını götürərək Nəzirənin başına çarpıb və ona xəsarət yetirib.
Hadisə ilə bağlı açılmış cinayət işinə bu ilin yanvarında Quba Rayon Məhkəməsində baxılıb. Məhkəmənin hökmü ilə Elvin 2 il 5 ay müddətinə azadlıqdan məhrum edilib.
