Qubada meşələrin qanunsuz kəsilməsi ilə bağlı yoxlama zamanı bəzi faktlar ortalığa çıxıb. Bu barədə ShimalNews 20 aprel tarixində “7 times”a istinadən məlumat verir.
ETSN-in əməkdaşları Quba Regional Meşə Təsərrüfatı Mərkəzinin 6-cı dolayında onlarla qanunsuz kəsilən ağac aşkarlayıblar. Diametri 30-100 mm arası olan bu ağaclar, əsasən, vələs və fısdıq növünə aid olublar. İzləri gizlətmək üçün bir neçə kötük torpaq altına basdırılıb.
Monitorinq zamanı mişar səsi eşidilib. Məlum olub ki, ekologiya müfəttişlərinin təftiş etdikləri meşə gözətçisi ağacları kəsir. O, iş başında tutulub, əvvəl inkar etsə də, sonradan əməlini etiraf edib.
Yoxlama nəticəsində meşə massivində kəsilib parçalara ayrılmış onlarla ağac aşkarlanıb. Onların bəziləri isə ağır texnika vasitəsilə kökündən çıxarılıb.
Bütün faktlar Ekologiya və Təbii Sərvətlər Nazirliyinin əməkdaşları tərəfindən aidiyyəti üzrə aktlaşdırılaraq qeydə alınıb.
[video width="1080" height="1080" mp4="https://shimal.news/storage/photos/2023/04/video4.mp4"][/video]
