Quba rayon mərkəzi xəstəxanasında laparoskopik cihazlarla əməliyyatlar keçiriləcək. Bu haqda 17 aprel tarixində ShimalNews İcbari Tibbi Sığorta üzrə Dövlət Agentliyinə istinadən məlumat verir.
Agentlik ginekoloji, uroloji və ümumi cərrahi əməliyyatların qapalı üsulla icrası üçün lazımi alətlər və aksesuarlar daxil olmaqla 18 dəst laparoskopik cihaz alıb. Bundan əlavə, cərrahi alətlərin, pasiyentlərə qulluq vasitələrinin yuyulması, dezinfeksiyası, paketlənməsi və sterilizasiyası üçün ümumilikdə 55 ədəd avadanlıq alınıb. Cərrahiyyə və reanimasiya şöbələrinə 35 ədəd əməliyyat masası, 120 cərrahi alət dəsti, 20 ədəd əməliyyat lampasının verilməsi nəzərdə tutulub.
İlkin mərhələdə laparoskopik cihazlarla Quba RMX ilə yanaşı, Respublika Klinik Xəstəxanası, Akademik M.Cavadzadə adına Respublika Kliniki Uroloji Xəstəxanası, Sabunçu, Qaradağ, Xətai və Sumqayıt tibb mərkəzləri, Abşeron, Ağdaş, Gəncə, Göyçay, Kürdəmir, Sabirabad, Saatlı, Şəki, Şirvan və Zaqatala rayon mərkəzi xəstəxanaları təchiz ediləcək.
