Qubada qızlar arasında idman yarışlarının təşkili çərçivəsində “Basketbolla sağlam ol” layihəsi icra olunur. Bu haqda ShimalNews 7 mart tarixində məlumat verir.
Zərdabi qəsəbə tam orta məktəbində basketbol üzrə turnirin ¼ final mərhələsinin oyunları keçirilib. Turnirdə Quba rayonunun Alekseyevka, Dağlı, Hacıhüseynli kənd tam orta, Qaraçay, Zərdabi qəsəbə tam orta, Quba şəhər 2 nömrəli məktəb liseyin, Quba rayon Birinci Nügədi kənd 1 nömrəli tam orta məktəbin 7-9-cu siniflərində təhsil alan qız şagirdlərindən ibarət 8 komanda iştirak edib.
Olimpiya sistemi üzrə keçirilən yarışın ¼ final mərhələsində Qaraçay qəsəbə tam orta məktəbinin komandası Alekseyevka kənd tam orta məktəbinin komandasına 4-2, Hacıhüseynli kənd tam orta məktəbinin komandası Birinci Nügədi kənd 1 nömrəli tam orta məktəbinin ikinci komandasına 6-2, Zərdabi qəsəbə tam orta məktəbinin basketbolçu qızları Birinci Nügədi kənd 1 nömrəli tam orta məktəbinin birinci komandasına 14-0, Quba şəhər 2 nömrəli məktəb-liseyin komandası isə Dağlı kənd tam orta məktəbinin komandasına 8-0 hesabı ilə qalib gələrək ½ finala vəsiqə qazanıblar.
Əsasnaməyə uyğun olaraq, finala vəsiqə qazanan komandalar ½ final mərhələsində qarşılaşacaq.
