Qubada həyat yoldaşını öldürən kişinin telefonunda “ölüm” adlı 1 saat 48 dəqiqə 43 saniyəlik səs yazısı tapılıb. Bu haqda ShimalNews 24 aprel tarixində “Publika.az”a istanadən xəbər verir.
Məlumata görə, istintaqla müəyyənləşdirilən səs yazısı 25 iyul 2023-cü il tarixdə gecə lentə alınıb. Həmin gün 26 yaşlı Rəşad qayınatasına məxsus evə gizli daxil olub. O, 24 yaşlı Rəvanəni amansızlıqla qətlə yetirib.
Səs yazılarında həmin şəxs arvadını yatmış vəziyyətdə öldürəcəyini, ürək nahiyəsindən zərbə endirəcəyini bildirir, sonra isə bıçaqla zərbələr endirir.
Bu zaman sağ çiyni üzərində yatmış Rəvanə yuxudan oyanaraq Rəşadın adını çəkir. Daha sonra qadının səsi kəsilir və ağlayan uşaq səsi gəlir. Bundan sonra qatil qışqıraraq evdə digər şəxsləri oyadır və arvadını qətlə yetirdiyini deyir.
Daha öncə hadisənin Qubanın Mahmudqışlaq kəndində baş verdiyi haqda xəbər dərc etmişdik.
Araşdırmalar zamanı məlum olub ki, Rəşad və Rəvanə arasında münasibətlər hadisədən bir neçə ay əvvəl pozulub. Qadın döyüldüyünə görə, ərindən şikayət edib və sonuncu həbs edilib.
Rəşad həbsdə olarkən Rəvanə atası evinə gedib. O, "TikTok" sosial şəbəkə vasitəsi ilə tanış olduğu Vüsal adlı şəxslə sevgi münasibətinə başlayıb. Onlar birgə Türkiyəyə istirahətə də gediblər.
Həbsdən çıxan Rəşad həyat yoldaşına əvvəlcə barışmağı təklif edib. Lakin sonra onu qətlə yetirmək qərarına gəlib. O, qayınatasının evdə olmadığı vaxt gecə saat 04 radələrində əməlini törədib.
Sumqayıt Ağır Cinayətlər Məhkəməsinin bir neçə gün əvvəl çıxardığı hökm ilə təqsirləndirilən şəxsə 16 il 8 ay müddətə azadlıqdan mərhumetmə cəzası kəsilib.
