Quba-Xaçmaz regionunda təhsil alan məktəblilərə Təhsilin İnkişafı Fondu kitab ianə edib. Bu barədə ShimalNews 13 mart tarixində məlumat verir.
Quba-Xaçmaz Regional Təhsil İdarəsinin (RTİ) tabeliyində fəaliyyət göstərən məktəblərin şagirdləri, müəllimləri və valideynlərlə görüş keçirilib. Tədbir Quba rayonunun Alekseyevka kənd tam orta məktəbində baş tutub.
Burada “Məktəblərə kitab ianəsi” layihəsi çərçivəsində kitabların təhvil verilməsi təşkil edilib. Quba-Xaçmaz Regional Təhsil İdarəsinin müdiri Coşqun Əliyev layihənin təşəbbüskarları olan Təhsilin İnkişafı Fondu və “Inci Group of Companies” şirkətinə təşəkkürünü bildirib.
Təhsilin İnkişafı Fondunun İdarə Heyətinin sədri Elnur Nəsibov layihə çərçivəsində ümumi ianə ediləcək kitabların sayının 4000 ədəd olduğunu, eləcə də növbəti həftələr ərzində digər RTİ-lərdə görüşlərin keçirilməsinin nəzərdə tutulduğunu bildirib.
“Inci Group of Companies” şirkətinin təsisçisi Mikayıl Yusifov layihənin bir hissəsi olduğu üçün özünü xoşbəxt hiss etdiyini və gələcəkdə də məktəbin şagirdləri üçün həvəsləndirici hədiyyələr və kitablar ianə edə biləcəyini vurğulayıb.
