Quba Olimpiya İdman Kompleksində birgə həyata keçirilən “İdmanda birləşək” mövzusunda II Çoxtərəfli Gənclik Mübadilə Proqramının açılış mərasimi baş tutub. Bu haqda ShimalNews 13 fevral tarixində xəbər verir.
Tədbir Gənclər və İdman Nazirliyi (Gİİ), Türk Dövlətləri Təşkilatı və Azərbaycan Dövlət Bədən Tərbiyəsi və İdman Akademiyası tərəfindən keçirilir və 17 fevraladək davam edəcək.
Proqramın açılış mərasimində Gİİ-nin Gənclərlə iş şöbəsinin müdiri Ramil Cabbarov, Türk Dövlətləri Təşkilatının Baş katibinin müavini Sədi Cəfərov, Azərbaycan Dövlət Bədən Tərbiyəsi və İdman Akademiyasının Tədris işləri üzrə prorektoru Rafail Novruzov və Quba Rayon İcra Hakimiyyəti başçısının müavini Səidə Abasova çıxış ediblər.
Mübadilə Proqramı türkdilli ölkələrin həmfikir gəncləri arasında təhsil, idman, mədəniyyət sahələrində əlaqələr yaratmaq, iştirakçı gənclərə idmanın fiziki, psixoloji, iqtisadi və siyasi aspektləri haqqında geniş bilik qazandırmaq, qədim türk xalqlarında mövcud olmuş idman oyunları ilə tanış etmək məqsədilə təşkil edilib.
