Növbədənkənar prezident seçkilərində ilk dəfə seçici kimi iştirak edəcək Qubadan olan tələbə bütün gəncləri fəal olmağa çağırır. Bu haqda ShimalNews 13 yanvar tarixində “Azərtac”a istinadən məlumat verir.
Azərbaycan Dövlət Pedaqoji Universitetinin Quba filialının II kurs tələbəsi Mənzər Heybətova bildirir ki, adının seçici siyahısında olmasını artıq yoxlayıb.
“Quba rayonunun Çartəpə kəndində yaşayıram. Bizim seçki məntəqəmiz də burada yerləşir. Valideynlərim həmişə prezident, parlament, bələdiyyə seçkilərində və ümumxalq səsverməsində (referendumda) fəal iştirak ediblər. Mən də onlardan nümunə götürmüşəm. Müasir dövrdə gənclərimiz ölkəmizin ictimai-siyasi həyatında fəal rol oynayırlar. Mən əminəm ki, gənclər qarşıdakı seçkilərdə də aktivlik nümayiş etdirəcəklər”, - gənc xanım bildirib.
Növbədənkənar Azərbaycan Respublikası Prezidenti seçkiləri 2024-cü il fevralın 7-nə təyin olunub.
