Quba Rayon Mərkəzi Xəstəxanasında ilk dəfə çənə sınığının açıq reduksiyası əməliyyatı icra olunub. Bu haqda ShimalNews 29 fevral tarixində məlumat verir.
İlk dəfə 42 yaşlı pasiyent üzərində həyata keçirilən əməliyyat 3 saata yaxın davam edib.
Həkimlər xaricdə təhsil alan və daha əvvəl Bakıda özəl tibb müəssisələrində çalışan üz-çənə cərrahı Dr. Vəlican Abbasov və rekonstruktiv-plastik cərrah Tərlan Hacızadə 08.02.2024-cü il tarixindən etibarən Quba Rayon Mərkəzi Xəstəxanasının Travmatoloji Mərkəzində fəaliyyətə başlayıblar.
Yeni yaradılan Regional Travmatoloji Mərkəzdə region üzrə - Quba, Xaçmaz, Qusar, Şabran və Siyəzən rayonlarının əhalisinə ixtisaslaşdırılmış tibbi xidmət, o cümlədən müvafiq profil üzrə mürəkkəb klinik hallar zamanı konsultativ-diaqnostik yardım göstərilir. İndiyədək yalnız paytaxtda fəaliyyət göstərən ixtisaslaşmış tibb müəssisələrində icrası mümkün olan bir sıra mürəkkəb travmatoloji əməliyyatlar artıq bu mərkəzdə də həyata keçirilir.
