Qubada alma satışında çətinliklər yaranıb. Bu haqda 20 aprel tarixində ShimalNews RealTV-yə istinadən məlumat verir.
Cari il soyuducu anbarlarda saxlanılan meyvələrin cəmi 10-15 faizi satılıb. Nəticədə anbarların kameralarında məhsulun böyük hissəsi qalıb. Fermerlərin sözlərinə görə, 2 aya yaxındır ki, meyvə satışında ciddi problem yaşanır və məhsullar keyfiyyətini itirmə təhülkəsi ilə üz-üzə qalıb.
“Daxili bazardakı qiymət çox ucuzdur. Bizə isə bu sərf eləmir. Azərbaycan bazarında məhsul bolluqdur. Artıq 7 aydır biz meyvəni saxlama kamerasına yerləşdirmişik, alma da xarab olur. Hal-hazırda biz almanı 50 qəpiyə satırıq. Bu da ancaq saxlama kamerasının pulunu ödəyir. Başqa heç bir gəlirimiz yoxdur” - deyə fermer Yusif Nöhbalayev bildirib.
Fermerlər hesab edirlər ki, mövcüd vəziyyətdə ən çox ziyan kiçik və orta təsərrüfat sahiblərinə dəyir. Məhsul satılmadığı üçün bir çox sahibkarlar becərmə işlərini apara bilmirlər.
Mütəxəssislər hesab edirlər ki, yaranan çətinlik rus rublunun dəyərini itirməsi ilə bağlıdır. Bu səbəbdən alma ixracı kəskin şəkildə zəifləyib.
Çətinlikləri aradan qaldırılmaq üçün alternativ bazarlar tapılmalıdır.
