Qubadan olan tələbə növbədənkənar prezident seçkilərində ilk dəfə seçici kimi iştirak edəcək. Bu haqda ShimalNews 11 yanvar tarixində "Azərtac"a istinadən məlumat verir.
Azərbaycan Dövlət Pedaqoji Universitetinin Quba filialının II kurs tələbəsi olan Emil İsmayılzadə tarix müəllimliyi ixtisası üzrə təhsil alır. 18 yaşı olan gənc həm həyəcanlı, həm də qürurlu olduğunu bildirib.
“Seçmək hüququnun böyük əhəmiyyəti var. Azərbaycanda seçki institutunun formalaşması haqqında dərslərimizdə oxumuşuq. Hələ ötən əsrin əvvəllərində Xalq Cümhuriyyətinin qurucuları müsəlman Şərqində ilk dəfə olaraq, qadınlara seçki hüququnun verilməsinə nail olublar. Biz bu haqda bütün beynəlxalq platformalarda fəxrlə danışırıq. Bu gün də Azərbaycanda demokratik dəyərlərə hörmətlə yanaşılır. Hər kəsin seçib, seçilmək hüququ var. Mən də bir gənc kimi yaradılan bu şəraitdən istifadə edib, fevralın 7-də məntəqəyə gedib, öz hüququmdan istifadə edəcəyəm. Əsas qürurverici məqam ondan ibarətdir ki, bu seçkilərdə qalib ölkənin vətəndaşları kimi iştirak edəcəyik”, - deyə Emil İsmayılzadə əlavə edib.
