Qubada Dağ yəhudilərinin İrsi Mərkəzində İkinci Dünya müharibəsində nasist Almaniyası üzərində qələbəyə və yəhudi xalqının məhv edilməkdən xilas olmasına həsr edilən tədbir keçirilib. Bu barədə ShimalNews 3 iyun tarixində “Report”a istinadən məlumat verir.
Əvvəlcə müharibə qurbanlarının xatirəsi yad edilib. Mərkəzin direktoru İqor Şaulov nasist Almaniyası tərəfindən yəhudilərə qarşı həyata keçirilən soyqırımın, amansız təqiblərin yəhudi xalqının tarixində dərin və kədərli iz buraxdığını qeyd edib.
Sərgidə İsrailin Azərbaycandakı səfiri Corc Dik də iştirak edib. O diqqətə çatdırıb ki, Azərbaycandan olan 680.000 əsgərin 300.000-i döyüşlərdə həlak olub. Bu qəhrəmanlıq tarixdə böyük iz buraxıb.
İlk dəfə təşkil olunan sərgidə dünyanın müxtəlif ölkələrində yaşayan yəhudilər tərəfindən bağışlanan nadir eksponatlar nümayiş etdirilib.
Ziyarətçilər bu ay ərzində sərgi ilə tanış ola biləcəklər.
