Quba rayonunun Yuxarı və Aşağı Xanagah kəndlərində yerləşən qədim məscidlər qəzalı vəziyyətə düşüb. Bu haqda ShimalNews 22 fevral tarixində “Report”a istinadən məlumat verir.
Yuxarı Xanagah Şahdağ Milli Parkının ərazisində, Aşağı Xanagahdan 4 kilometr məsafədə yerləşir. Bu kənddə 2 əsrə yaxın yaşı olan binalar var. Onlardan biri də 1868-ci ildə inşa edilən məsciddir.
İbadət ocağı yararsız hala düşdüyündən hazırda fəaliyyət göstərmir. 156 yaşı olan məscid tamamilə dağılıb.
Məscid Nazirlər Kabinetinin 2 avqust 2001-ci il tarixli qərarı ilə dövlət qeydiyyatına götürülüb, daşınmaz tarix və mədəniyyət abidələrinin siyahısına yerli əhəmiyyətli memarlıq abidəsi kimi 4660 inventar nömrəsi ilə daxil edilib.
"Tarixi abidələr dövlət büdcəsində dövlət əsaslı vəsait qoyuluşu hesabına tikintisi nəzərdə tutulmuş layihələrin siyahısına daxil edilərək mərhələli şəkildə bərpa, konservasiya işləri həyata keçirilir. Bu məqsədlə Xanagah kənd məscidi də müvafiq siyahıya daxil edilib və investisiya layihələrinin icrası çərçivəsində bərpası planlaşdırılır. Eyni zamanda ölkə ərazisində bərpaya ehtiyacı olan tarixi abidələrin çoxluğunu nəzərə alaraq, belə tarixi tikililərin qanunvericilik çərçivəsində ianələrlə bərpa edilməsində də maraqlıyıq. Bu istiqamətdə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tərəfindən müəyyən təbliğat işləri aparılır", – deyə Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynli bildirib.
