Kənd təsərrüfatı nazirinin (KTN) müavini Sarvan Cəfərov Qubada vətəndaşları qəbul edib və təsərrüfatlara baş çəkib. Bu barədə ShimalNews 12 mart tarixində məlumat verir.
Bu gün Quba Dövlət Aqrar İnkişaf Mərkəzinin inzibati binasında müraciətlər dinlənilib, ərizə və şikayətlərə baxılıb.
Vətəndaşlar, əsasən, əkin subsidiyası, torpaq üzərində mülkiyyət hüququnu təsdiqləyən sənədlərin əldə olunması, dövlət qulluğuna qəbul qaydaları və digər mövzuları ünvanlayıblar.
Qəbuldan sonra S.Cəfərov mərkəzin kollektivi ilə görüşüb, yazlıq əkinlərin bəyanı və sığortalanması prosesi ilə maraqlanıb. Eləcə də Zərrabi qəsəbəsində fermer Elşən Həsənova məxsus 15 hektar intensiv bağa baxış keçirilib.
Sonda Meyvəçilik və Çayçılıq Elmi-Tədqiqat İnstitutunda kollektivlə görüş baş tutub. Biotexnologiya laboratoriyasının fəaliyyəti, istixana şəraitində calaqaltı və ting yetişdiriciliyi ilə tanışlıq olub.
