İsmayıllıda müəllimə bədii tikmə sənətinin azsaylı xalqlar arasında təbliği layihəsinin icrasını həyata keçirir. Bu haqda ShimalNews 27 noyabr tarixində Dünya TV-yə istinadən xəbər verir.
Kimya-biologiya müəllimi Günay Əhmədova maraqlı bir addım atıb. O, iştirak etdiyi yeddinci “grand” müsabiqəsində qalib olduğu “İlmələrin işığında” bədii tikmə sənətinin azsaylı xalqlar arasında təbliği layihəsinin icrasını davam etdirir.
Heydər Əliyev adına İvanovka kənd tam orta məktəbin şagirdləri olan qızlara tikmə sənətinin - milli naxışlarımızın incəlikləri öyrədilir. Məktəbdə təhsil alan qızlar da könüllü olaraq bu layihəyə qoşulublar.
Müəllimin məqsədi qədim milli sərvətimiz olan tikmə sənətinin gözəlliklərini, incəliklərini azsaylı xalqlar arasında təbliğ etməkdir.
“Məktəbimizdə ukrayna, rus, ləzgi, haput, kürd və digər xalqlara məxsus olan şagirdlər təhsil alırlar. Düşündüm ki, mən Azərbaycan milli naxışlarını, ornamentlərini, tikmə sənətini, toxuculuq sənətini məhs bu xalqlar arasında təbliğ edim və layihəm qalib gəldi”, deyə Günay Əhmədova bildirib.
