İsmayıllının Həftəsov kəndində bir vaxtlar yüzlərlə sakin yaşasa da, indi cəmi 5 nəfər qalıb. Bu haqda ShimalNews 20 yanvar tarixində İctimai TV-yə istinadən məlumat verir.
Lahıcla qonşu olan bu və ondan sonra gələn 4 kəndə getmək üçün Girdiman çayına girməlisiniz. Bunun üçün camaat hündür maşınlardan istifadə edir. Amma bu da hər dəfə mümkün olmur. Çayda daşqınlar olanda çaya girmək insan həyatı üçün təhlükəlidir. Elə bu səbəbdən də kəndlilər məcbur qalıb, yurdlarını tərk edirlər.
Yağıntı olanda, xüsusilə də qarlı havada Həftəsov, Çəndəhar, Zarat və Burovdal kəndlərinin əsas yola çıxışı aylarla bağlı qalır. Bütün əzablara son qoymaq üçün isə bircə körpü inşa edilməlidir.
Həftəsovun hər küncündə tarix yatır. Qədimi məscid, dəyirman, hamam və digər abidələr hələ ki, qalıb. Bura və ətraf kəndlərə sərmayə yatırmaq üçün gələnlər olub. Lakin yolun çətinliyi sahibkarları bu fikirdən daşındırıb.
Azərbaycan Avtomobil Yolları Dövlət Agentliyindən verilən məlumata görə, qeyd edilən kəndlərin yollarının yenidən qurulması ilə bağlı təkliflər hazırlanıb. Növbəti investisiya proqramlarına salınaraq əsaslı şəkildə yenidən qurulması nəzərdə tutulur.
[video width="1920" height="1080" mp4="https://shimal.news/storage/photos/2024/01/Sequence-01_124.mp4"][/video]
