İsmayıllı rayonunda yanğın təhlükəsizliyinin təmin olunması üçün müasir üslublu və böyük ölçülü sosial reklam lövhələri quraşdırılıb. Bu barədə ShimalNews 29 aprel tarixində Fövqəladə Hallar Nazirliyinə istinadən məlumat verir.
Həmin reklam lövhələrinin ətrafında maarifləndirmə tədbirləri də keçirilib. Burada icra hakimiyyətinin məsul əməkdaşları və inzibati ərazi dairələri üzrə nümayəndələri, bələdiyyə sədrləri, Ekologiya və Təbii Sərvətlər Nazirliyinin Regional Meşə Təsərrüfatı mərkəzlərinin və “Aqroservis” ASC-nin nümayəndələri, yerli sahibkarlar və fermerlər iştirak ediblər.
Görülən işlərin yanğın təhlükəsizliyinə dair biliklərin aşılanması baxımından mühüm addım olduğu iştirakçılara bildirilib. Onlara maarifləndirici çap materialları paylanılıb.
Həmçinin taxıl biçini mövsümünün başlanması ərəfəsində müəssisə və təşkilat rəhbərlərinə, kənd təsərrüfatı fəaliyyəti ilə məşğul olan şəxslərə DYNX-nin mütəxəssisləri tərəfindən müvafiq yanğın təhlükəsizliyi normaları barədə ətraflı məlumat verilib.
