İsmayıllıda oğurladığı qızıl-zinət əşyalarının hesabına xarici ölkələrə səyahət edən şəxs tutulub. Bu barədə ShimalNews 19 dekabr tarixində Daxili İşlər Nazirliyinə istinadən məlumat verir.
Hadisə şəhər ərazisində baş verib. 32 yaşlı Qazax rayon sakini Adil Hacıyev qızıl-zinət mağazasına gecə saatlarında daxil olaraq 25.000 manat dəyərində əşyaları oğurlayıb.
İlkin araşdırma zamanı müəyyən edilib ki, Adil həmin gün səhər saatlarında Qazaxdan İsmayıllıya gəlib. Burada yerləşən mağazaları izləyib və qaranlıq vaxtı oğurluq edib. Səhəri gün isə Bakı şəhərinə gedərək qızılları paytaxtın müxtəlif yerlərində satıb.
Oğurluq edən şəxs əldə etdiyi pulu xarici ölkələrdən birinə gedərək orada əyləncəsinə xərcləyib. Geri qayıtdıqda isə o, polis orqanları tərəfindən tutularaq istintaqa təhvil verilib.
Faktla bağlı cinayət işi başlanıb, saxlanılan şəxsin digər analoji əməllərdə iştirakının olub-olmaması araşdırılır. Məlumdur ki, Adil əvvəllər də eyni əmələ görə dəfələrlə məhkum olunmuşdur.
