İsmayıllı rayonunda şagirdlər üçün Səfərbərlik və Hərbi Xidmətə Çağırış üzrə Dövlət Xidməti (SHXÇDX) təlim təşkil edib. Bu haqda ShimalNews 3 noyabr tarixində xidmətə istinadən məlumat verir.
Zərərli vərdişlərin fəsadlarına həsr edilmiş konfrans 6 saylı orta məktəbdə keçirilib. Tədbirdə Dövlət Xidmətinin əməkdaşları ilə yanaşı, bir sıra dövlət qurumlarının məsul şəxsləri iştirak ediblər.
Tədbirdə çıxış edən polkovnik-leytenant Füzuli İsmayılov yuxarı sinif şagirdlərinə həqiqi hərbi xidmətə mənəvi-psixoloji cəhətdən hazırlanma sahəsində görülən işlərdən danışıb. 6 saylı məktəbin məzunu olmuş Vətən Müharibəsi Qəhrəmanı polkovnik-leytenant Anar Mirzəyev isə yeniyetmələrlə 44 günlük müharibə ilə bağlı xatirələrini bölüşüb.
Sonda bir neçə müharibə iştirakçısına "Vətən müharibəsi iştirakçısı" medalı təqdim edilib.
