İsmayıllı və Evian-Le-Ba şəhərləri arasında Dostluq və Əməkdaşlıq Xartiyası qüvvədən düşüb. Bu haqda ShimalNews 28 dekabr tarixində Azərtac-a istinadən məlumat verir.
Xartiyanın qüvvədən düşməsi ilə bağlı Bəyanat Rayon İcra Hakimiyyəti başçısı yanında daimi məşvərətçi orqan olan Şura tərəfindən yayılıb.
2023-cü il dekabrın 18-də Evian şəhər bələdiyyə şurasının iclasında ölkəmizə qarşı əsassız ittihamlar səsləndirilib, şəhər meri “Azərbaycan Bağı” adlı ərazidə qeyd edilmiş yazıların hamısının silindiyini elan edib.
İsmayıllı RİH başçısı yanında daimi Şuranın üzvləri Evian şəhər bələdiyyə şurasının məlum iclasında ölkəmizə qarşı səsləndirilən qərəzli və qeyri-obyektiv fikirləri qətiyyətlə rədd edir və “Azərbaycan Bağı” ilə bağlı qərarı pisləyirlər. Fransanın ölkəmizə qarşı apardığı anti-Azərbaycan siyasətinə və Evian şəhər bələdiyyə şurasının qərarına etiraz əlaməti olaraq, Dostluq və Əməkdaşlıq Xartiyası dekabrın 26-sı qüvvədən düşmüş hesab edilir.
