İsmayıllı rayon sakinlərindən dələduzluq yolu ilə pul alan şəxs barəsində polis tədbir görüb. Bu haqda ShimalNews 27 noyabr tarixində DİN-ə istinadən xəbər verir.
Keçirilən əməliyyat nəticəsində əməli törətməkdə şübhəli bilinən 19 yaşlı Bakı şəhər sakini Yaşar Məmmədov saxlanılıb.
Araşdırma zamanı məlum olub ki, Y.Məmmədov qadınların “İnstagram” sosial şəbəkədəki fotolarını oğurlayıb, onları saxta hesablar yaratmaq üçün istifadə edib. Daha sonra isə digər saxta hesab vasitəsilə həmin qadınlara yazaraq, özünü “Roman” adı ilə təqdim edib. O, qadınlara dostunun xaker olduğunu və pul müqabilində həmin saxta hesabların silinməsinin mümkün olduğunu bildirirmiş.
Bu kimi vədlərlə dələduz ümumilikdə 5.000 manata yaxın pulu ələ keçirib. İstintaq zamanı Y.Məmmədovun respublikanın digər şəhər və rayon sakinlərinə qarşı da analoji cinayətlər törətdiyi müəyyən edilib.
Faktla bağlı cinayət işi başlanılıb, zəruri istintaq hərəkətləri davam etdirilir.
