İsmayıllı rayonunda “Dini fanatizm, radikalizm və ekstremizmin mahiyyəti və təhlükələri” mövzusunda maarifləndirici tədbir keçirilib. Bu haqda ShimalNews 16 dekabr tarixində RIH-yə istinadən məlumat verir.
Dini Qurumlarla İş üzrə Dövlət Komitəsinin Şamaxı bölgəsi üzrə şöbəsi və İsmayıllı Rayon İcra Hakimiyyətinin birgə təşkilatçılığı ilə baş tutan tədbir Heydər Əliyev Mərkəzində həyata keçirilib.
İştirakçılara dini fanatizm, radikalizm və ekstremizmin mahiyyəti və təhlükələri, eləcə də yaratdığı fəsadlar barədə məlumat verilib. Bundan əlavə, məkrli məqsədlərinə nail olmaq üçün cəmiyyət arasında dini, milli və məzhəb ayrı-seçkiliyi salaraq mövcud toplumu parçalamağı rəhbər tutan və xarici dini mərkəzlərə bağlı olan qeyri-ənənəvi dini cərəyanlar, radikal dini qruplaşmaların fəaliyyətinin qarşısının alınmasından, radikal dini təsirlər və yad dini ideologiyalardan qorunmanın üsullarından, bu istiqamətdə dövlətin həyata keçirdiyi tədbirlərdən, o cümlədən radikalizmlə mübarizədə xalqımızın zəngin milli-mənəvi, tolerant və multikultural dəyərlərinin gənclər arasında fəal təbliğ edilməsinin əhəmiyyətindən bəhs edilib.
Tədbir diskussiya şəklində davam etdirilib, iştirakçıların sualları cavablandırılıb.
