Tanınmış bioloq-alim İsmayıl Zülfüqarov ömrünün 65-ci ilində dünyasını dəyişib. Bu barədə ShimalNews 10 yanvar tarixində xəbər verir.
Mərhum İsmayıllı rayonunun Talıstan kəndində ziyalı ailəsində anadan olub. O, biologiya sahəsində tanınmış alim, Elm və Təhsil Nazirliyinin Molekulyar Biologiya və Biotexnologiyalar İnstitutunun Proteomiks beynəlxalq laboratoriyasının müdiri, Cənubi Koreyanın Pusan Milli Universitetinin 17 il tədqiqatçı-professoru olmuş, biologiya üzrə fəlsəfə doktoru kimi fəaliyyət göstərmişdir.
Eləcə də İsmayıl Zülfüqarov 140-dan çox elmi əsərin müəllifidir. Onun rəhbərliyi ilə 1 fəlsəfə, 2 magistr dissertasiyası uğurla müdafiə edilib. 2 fəlsəfə doktoru dissertasiya işi müdafiə üçün hazırlanıb. O, dəfələrlə Avropa Birliyinin, BMT-nin Ərzaq və Kənd Təsərrüfatı Təşkilatının (FAO) tədbirlərində Azərbaycanı uğurla təmsil edib.
