İsmayıllının Buynuz kəndindən keçərək Şahdağ Milli Parkı ərazisində zubrlara rast gəlmək olar. Bu barədə ShimalNews 23 dekabr tarixində Azərtac-a istinadən məlumat verir.
Qafqazda 1 əsrə yaxındır ki, zubrların kəsilən nəsli yenidən bərpa edilir. Rəsmlərini Qobustan qayalarında, özlərini isə cizgi filmlərində gördüyümüz Qafqaz zubrlarına indi canlı da baxmaq mümkündür.
Bu, IDEA İctimai Birliyi, Ekologiya və Təbii Sərvətlər Nazirliyi, Ümumdünya Vəhşi Təbiəti Mühafizə Fondunun Azərbaycan nümayəndəliyinin birgə fəaliyyəti ilə mümkün olub.
Şimali Qafqazda sonuncu zubr 1927-ci ildə ovçular tərəfindən öldürülsə də, Cənubi Qafqazda onların nəsli daha əvvəl kəsilib. Qafqaz zubru kimi tanınan bu heyvanlar həm dəyişən iqlimin təsiri, həm də ovçuların hücumları nəticəsində nadir heyvana çevrilib.
Bolluq olanda bu iribuynuzlu hər il bala verir, qıtlıq vaxtı isə hər 2 ildə bir dəfə. Bu səbəbdən zubrlara əlavə yemləmə təmin edilir.
“Zubrlar quru ot, palıd qozası, digər qüvvəli yemlərlə qidalanır. Həmçinin bu heyvanlar meşə ərazisində vektronik aerokosmik monitorinq metodu vasitəsilə izlənir. Belə ki, ana zubrların boğazına siqnalötürücü xalta taxılıb. Bununla da zubrların hərəkətini telefonda proqram vasitəsilə izləyərək, olduqları ərazini aşkar edə bilirik”, - deyə sahə müfəttişi Rafael Musayev bildirib.
