Mətin həmin gün səhər saat 9:00 radələrində yaşadığı evdə mübahisə zamanı həyat yoldaşı Banunun üz nahiyəsinə başı ilə zərbə vurub. Daha sonra ona müxtəlif dərəcəli bədən xəsarətləri yetirib. Ardınca masanın üzərindən götürdüyü bıçaqla qadını vurub.

İstintaq orqanı tərəfindən Mətinin barəsində Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham elan edilib.

Cinayət işi üzrə təqsirləndirilən şəxs qismində ifadə verən Mətin ittiham üzrə özünü təqsirli bilib. O, ifadəsində göstərib ki, 2007-ci ildə Banu ilə evlənib: “Banu 2021-ci ilin yayından Balakən şəhərində bazarın ərazisindəki çörək sexində fəhlə işləyir. Son vaxtlar onun işlətdiyi mobil telefonuna baxdıqda, telefona daxil olan və çıxan zənglərin silindiyini gördüm. Bu, məndə şübhə yaratdı. Həyat yoldaşım mənə soyuqluq etdiyindən şübhələrim artdı. Qeyd olunan səbəbdən həyat yoldaşımın hər hansı şəxslərlə əlaqəsinin olub-olmamasını müəyyənləşdirmək qərarına gəldim”.

Təqsirləndirilən şəxs qeyd edib ki, bu məqsədlə 6 yanvar 2023-cü ildə təxminən səhər saat 10:00 radələrində özünə məxsus “Samsung Duos” markalı telefonun səsyazan funksiyasını açaraq telefonu Banunun yatdığı çarpayının altına qoyub:

“Bir müddət sonra telefonu götürərək səsyazılarına qulaq asdıqda həm televizordan gələn səsləri, həm də kişi cinsli şəxsə məxsus səs eşitdim. Kişini tanımadım. Bu səbəbdən arvadım mənə xəyanət etdiyini fikirləşdim və onu cəzalandırmaq qərarına gəldim. Yanvarın 18-də saat 9:00 radələrində Banu ilə söhbət əsnasında səsyazısını ona dinlətdirdim, səsi gələn kişinin kim olduğunu soruşdum. Banu isə bunları inkar elədi, mənə xəyanət etmədiyini bildirdi. Mən əsəbləşərək başımla onun sifətinə bir zərbə vurdum. Banunun dodağından qan axmağa başladı”.

Mətinin ifadəsinə görə, mübahisə zamanı Banu çarpayının üstünə yıxılıb: “Stolun üzərində olan mətbəx bıçağını götürdüm, əvvəlcə onun göz nahiyəsinə, ardınca çiyninə, daha sonra isə hazırda xatırlamadığım yerlərinə bıçaq zərbələri vurdum. Banudan qan axmağa başladığı üçün dayandım. Ona tibbi yardım göstərərək əl-üzünü yumasına və əynində olan qana bulaşmış paltarları dəyişməsinə köməklik göstərdim. Bu barədə telefonla anama və qardaşıma məlumat verdim.

Qardaşım hadisə ilə bağlı həm polisə, həm də təcili yardım xidmətinə məlumat verdi. Banu təcili yardım maşını ilə xəstəxanaya, mən isə polis əməkdaşları tərəfindən Balakən Rayon Polis Şöbəsinə aparıldım. Əlimdəki bıçağı tulladığım yeri xatırlamıram”.

İş üzrə zərərçəkmiş qismində Banu ifadə verib: “Səsyazısına qulaq asdıqda bunların televizordan gələn səs olduğunu dedim. Mətin isə inanmadı, səsi gələn kişinin kim olduğunu soruşdu. Mən bir daha Mətinə televizordakı verilişdən səs gəldiyini dedim. Mətin başı ilə ağız nahiyəmə bir zərbə vurdu, dodağımdan qan axmağa başladı. Daha sonra stolun üzərində olan mətbəx bıçağını götürərək məni çarpayının üzərinə yıxdı. Ardınca sol çiyin, ürək, göz və sifət nahiyələrimə bıçaqla zərbələr endirdi”.

Zərərçəkmiş qeyd edib ki, daha sonra Mətin əməllərini dayandırıb: “Mənə tibbi yardım göstərdi, əl-üzümü yumağıma, qana bulaşan paltarlarımı dəyişməyimə kömək elədi, telefonda anama məlumat verdi. Ardınca isə evi tərk edərək getdi. Bir müddət sonra anam, digər qohumlarımız gəldi. Mənim yerdə qana bulamış vəziyyətdə uzandığımı gördülər. Təcili yardım maşını ilə məni Balakən Rayon Mərkəzi xəstəxanasına apardılar”.

Bu cinayət işinə Şəki Ağır Cinayətlər Məhkəməsində baxılıb. Məhkəmənin hökmü ilə Mətinin barəsində Cinayət Məcəlləsinin 62-ci maddəsi tətbiq olunub və ona 2 il müddətinə azadlıqdan məhrumetmə cəzası təyin olunub.

Hökmdən narazı qalan təqsirləndirilən şəxs apellyasiya şikayəti verib. O, barəsində Cinayət Məcəlləsinin 70-ci (şərti məhkum etmə) maddəsi tətbiq olunmasını istəyib. Şəki Apellyasiya Məhkəməsi şikayəti təmin etməyib.