Xaçmaz rayonunun müxtəlif ərazilərində yolların asfalt örtüyünün olmaması və mövcud örtüyün yararsız vəziyyətdə olması sakinlərin gündəlik həyatını çətinləşdirir. Bir neçə dəqiqəlik yağışdan sonra gölməçələrə, palçığa və çala-çuxura çevrilən yollarla bağlı sakinlər aidiyyəti qurumların diqqətini gözləyirlər.
Shimal.News-a müraciət edən sakinlər Xaçmaz şəhərinin Günəşli prospektində, Hacıqurbanoba və İlxıçı kəndlərində, eləcə də Xudat şəhərinin Heydər Əliyev küçəsində yol infrastrukturunun bərbad vəziyyətdə olduğunu bildiriblər.
Xaçmaz şəhəri Günəşli prospektinin sakinləri qeyd edirlər ki, ərazidə gediş-gəlişin intensiv olmasına baxmayaraq, yol uzun illərdir asfaltlanmır. Onların sözlərinə görə, yolun təmir ediləcəyi dəfələrlə bildirilsə də, indiyədək bu istiqamətdə konkret iş görülməyib. Problemin həlli üçün sakinlər öz aralarında pul toplayaraq yola daş tökdürüblər. Lakin bu addım da vəziyyəti köklü şəkildə dəyişməyib. Yağış yağan kimi yol yenidən əvvəlki vəziyyətinə qayıdır, ərazidə gölməçələr yaranır.
Hacıqurbanoba kəndinin sakinləri də oxşar problemlə üzləşdiklərini deyirlər. Bildirilib ki, kənddaxili yollar daş-çınqıl örtüklüdür. Yağışlı havalarda yollar palçığa çevrilir, bu da sakinlərin gediş-gəlişini çətinləşdirir. Onlar kənd yollarının asfaltlanmasını istəyirlər.
Xudat şəhəri Heydər Əliyev küçəsində yaşayan sakinlərin şikayəti isə məhəllədaxili yolların vəziyyəti ilə bağlıdır. Onların sözlərinə görə, asfalt örtüyü olmayan küçədə yağışlı havalarda hərəkət etmək çətinləşir. Bu vəziyyət xüsusilə məktəbə gedən uşaqlar üçün problem yaradır.
İlxıçı kəndinin sakinləri isə yolun vəziyyətinin hətta qısa müddətli yağışdan sonra da yararsız hala düşdüyünü bildirirlər. Onların sözlərinə görə, cəmi 10 dəqiqə yağan yağışdan sonra ərazidə gölməçələr yaranır, çala-çuxurlar su ilə dolur. Sakinlər uzun müddətdir bu problemlə üzləşdiklərini, lakin indiyədək aidiyyəti qurumların vəziyyətin yaxşılaşdırılması üçün tədbir görmədiyini iddia edirlər.
Sakinlər yolların müvəqqəti deyil, əsaslı şəkildə təmir olunmasını, xüsusilə asfalt örtüyü olmayan küçə və kənd yollarının abadlaşdırılmasını istəyirlər.
