Son dövrlərdə sosial şəbəkələrdə fırıldaqçılığın yeni forması ortaya çıxıb.
İnsanoid xəbər verir ki, fırıldaqçılar Facebook platformasında saxta ƏDV qaytarılması səhifəsi yaradıblar və bu səhifənin dövlətə məxsus olduğuna inandırmaq üçün müxtəlif rəsmi qurumların loqolarından istifadə edirlər. Bu yolla vətəndaşları aldadaraq onların şəxsi və maliyyə məlumatlarını ələ keçirməyi hədəfləyirlər.
Fırıldaqçılar Facebookda yerləşdirilən saxta linklər vasitəsilə istifadəçiləri həmin səhifələrə yönləndirirlər. Keçid etdikdən sonra ilk mərhələdə vətəndaşlardan FİN kodları istənilir. Kod daxil edildikdən sonra şəxsi məlumatlar və guya qaytarılacaq məbləğlər göstərilir. Sorğu qəbul edildikdən sonra kart məlumatları tələb olunur. Bu mərhələdə hətta təhlükəsizlik üçün yalnız kart sahibinin bildiyi CVV kodu belə daxil edilməlidir.
Bütün məlumatlar ötürüldükdən sonra isə kartdan məbləğ mənimsənilir. Fırıldaqçılar bu üsulla aldadılanların bank hesablarından pul oğurlayırlar. Bu cür saxta səhifələr vasitəsilə edilən dələduzluqlar vətəndaşlara ciddi maliyyə itkiləri yaşadır.
