Bu gün Dövlət Turizm Agentliyinin (DTA) sədri Fuad Nağıyev İsmayıllının Basqal qəsəbəsində vətəndaşların qəbulunu keçirib. Bu barədə ShimalNews 5 iyun tarixində quruma istinadən məlumat verir.
Görüşdə sakinləri maraqlandıran suallar cavablandırılıb, onların fikirləri dinlənilib və müvafiq tapşırıqlar verilib.
Qəbulda nadir memarlığı, qədim ipəkçilik, dəmirçilik kimi xalq sənətkarlıq ənənələri və orta əsr şəhərsalma mədəniyyəti ilə Azərbaycanın mədəniyyət tarixində xüsusi əhəmiyyətə malik Basqalın turizm potensialının tanıdılması məqsədilə son dövrlərdə görülən tədbirlərin əhəmiyyəti qeyd olunub. Bərpa və yenidənqurma işlərindən sonra qəsəbəyə turistik səfərlərin sayında xeyli artımın müşahidə olunduğu, bununla əlaqədar qəsəbənin sosial-iqtisadi həyatında canlanmanın yaranmasına, turizmlə bağlı məşğulluq imkanlarının artmasına töhfə verdiyi bildirilib.
Qarşıda Şeyx Məhəmməd və Hacı Bədəl məscidinin bərpası, Basqal Mədəniyyət evinin əsaslı təmiri, keçmiş məktəb binasının (çoxtəyinatlı turizm mərkəzi) əsaslı təmiri, 6 tarixi evin bərpası planlaşdırılır.
Bununla yanaşı, Basqala səfər edən turistlərin sayı artan templə davam etdiyindən, Basqal meydanından Basqal tarixi qəbiristanlığına gedən yolun abadlaşdırılaraq turizm marşrutuna əlavə olunması, Partizan Məmmədin evinin təmir olunaraq muzeyin yaradılması və digər işlər də nəzərdə tutulur.
