Bazarlarda "kənd məhsulu" adı ilə satışa çıxarılan süd, qatıq, kərəyağı və müxtəlif meyvə-tərəvəzlər ilk baxışdan təbii təsir bağışlasa da, alıcıların böyük hissəsi bu məhsulların həqiqətən təbii şəraitdə yetişdirilib-yetişdirilmədiyinə şübhə ilə yanaşır.
Xezer TV-nin məlumatına görə, xüsusilə bölgələrdən gətirilən məhsulların bazara çıxışı azalıb. Satıcılar bildirirlər ki, kənd təsərrüfatı məhsullarının həcmi əvvəlki illərlə müqayisədə xeyli azdır və olan məhsullar daha çox yerində satışa yönəlir.
Şəkidən olan satıcıların sözlərinə görə, iqlim şəraiti və təsərrüfat imkanlarının məhdudluğu istehsala birbaşa təsir göstərir:
"Kənd məhsulu azdır. Otlaq sahələri yoxdur, mal saxlamaq çətindir. Camış yağı təxminən 25 manata, inək yağı isə 20 manata satılır. Meyvələrin qiyməti isə 2–5 manat arasında dəyişir".
Qida məsələləri üzrə ekspert Seymur Qafarov bildirir ki, əsl kənd məhsulu dedikdə sənaye üsulu ilə deyil, kiçik təsərrüfatlarda, mövsümə uyğun və minimal müdaxilə ilə yetişdirilən qidalar nəzərdə tutulmalıdır. Lakin bazarda nəzarət və sertifikatlaşdırma mexanizmlərinin zəif olması istehlakçı üçün real fərqi müəyyən etməyi çətinləşdirir.
Ekspertə görə, bəzi hallarda məhsulların kustar qablaşdırılması, xarici görünüşünün "təbii" təsiri bağışlaması və ya heyvan mənşəli məhsullarda vizual effektlərin yaradılması alıcıları çaşdıra bilər. Bu səbəbdən məhsulun yalnız görünüşünə deyil, keyfiyyət göstəricilərinə də diqqət yetirilməlidir.
Mütəxəssislər vurğulayır ki, məsələ artıq yalnız qiymət və dadla məhdudlaşmır. Burada əsas faktor etibar, nəzarət mexanizmləri və istehsal mədəniyyətidir. Dəstək və tənzimləmə mexanizmləri gücləndirilməzsə, "kənd məhsulu" anlayışının məzmunu getdikcə zəifləyə bilər.
