Siyəzənin ucqar kəndinə şagirdlərə təsviri incəsənət fənnini tədris edən Nərgiz İsmayılova hər həftə Sumqayıtdan Yanıq Ələzə uzun yol qət edir.
Azedu.az-ın məlumatına görə, 26 yaşlı müəllimə əslində tibb sahəsində təhsil alıb. Gəncə Tibb Kollecində feldşer ixtisasını bitirsə də, ürəyindəki müəllimlik arzusu onu tam fərqli yola aparıb. O, sonradan ali məktəbə hazırlaşaraq Gəncə Dövlət Universitetinin Təsviri incəsənət müəllimliyi ixtisasına qəbul olub.
Hazırda Siyəzən rayonunun Yanıq Ələz kənd məktəbində çalışan Nərgiz müəllimə həftənin bir günü Sumqayıtdan uzun və çətin yol qət edərək kənd məktəbinə gedir. Məktəbdə dərs saatı az olduğuna görə bütün dərslərini bir günə toplayıb.
Müəllimə deyir ki, ailəsi onu həkim kimi görmək istəsə də, o, müəllimlik sevgisindən vaz keçə bilməyib:
"Fikirləşdim ki, insan sevdiyi peşə ilə məşğul olanda daha uğurlu olur. Tibb sahəsində işləyə bilərdim, amma müəllimlik mənim ruhuma daha yaxındır", – deyə Nərgiz İsmayılova bildirib.
O qeyd edir ki, şagirdlərlə münasibəti yalnız dərs saatları ilə məhdudlaşmır. Müxtəlif əl işləri, plakatlar və rəsmlər hazırlayan müəllimə şagirdlərlə onlayn şəkildə də əlaqə saxlayır, onların çəkdikləri rəsmlərə məsafədən dəstək olur.
Nərgiz müəllimənin ən böyük arzularından biri ucqar kəndlərdə yaşayan uşaqların təhsildən uzaq düşməməsidir:
"İstəyirəm ki, onlar 9-cu sinifdən sonra təhsili yarımçıq qoymasınlar. Bacarıqlı uşaqların oxumasını, inkişaf etməsini görmək mənə xoşbəxtlik verir", – deyə o vurğulayıb.
Müəllimənin sözlərinə görə, ilk aylarda məktəbə gedib-gəlmək olduqca çətin olub. Kənd yolunun yararsız vəziyyətdə olması səbəbindən o, digər müəllimlərlə və ya xüsusi nəqliyyat vasitələri ilə məktəbə çatmağa çalışıb. Sonradan yolun təmir olunması vəziyyəti nisbətən yüngülləşdirib.
Nərgiz İsmayılova gələcəkdə magistratura təhsili almağı və müəllimlik sahəsində daha da inkişaf etməyi planlaşdırır.
