İsmayıllı rayonunda çayda köməksiz vəziyyətdə qalan şəxslər xilas olunub.
Shimal.News xəbər verir ki, hadisə Girdiman çayının rayonun Zərnava kəndindən keçən hissəsində baş verib.
İlkin məlumata görə, 1980-ci il təvəllüdlü Cümşüd Hüseynova məxsus "Niva" markalı avtomobil çaydan keçmək istəyən zaman suyun güclü axını səbəbindən hərəkətsiz qalıb. Nəticədə sürücü və avtomobildə olan daha 4 nəfər köməksiz vəziyyətdə qalıb.
Məlumat daxil olduqdan sonra hadisə yerinə FHN-in Dövlət Yanğından Mühafizə Xidmətinin İsmayıllı Rayon Yanğından Mühafizə Hissəsinin yanğınsöndürən-xilasediciləri cəlb olunub.
Əraziyə baxış zamanı avtomobilin çayda suyun axını səbəbindən hərəkət edə bilmədiyi müəyyən edilib. Xilasedicilərin həyata keçirdiyi operativ tədbirlər nəticəsində avtomobildə köməksiz vəziyyətdə qalan 5 nəfər təhlükəsiz əraziyə çıxarılıb.
