Xaçmaz rayonunda şaftalı istehsalı genişlənir. Rayonda bu meyvənin yetişdirildiyi bağların ümumi sahəsi 4114,8 hektara çatıb.
Shimal.News-un məlumatına görə, yerli şaftalı yüksək keyfiyyəti və dadı ilə seçilir. Məhsulun bir hissəsi ölkənin müxtəlif bölgələrinə göndərilir, böyük hissəsi isə Rusiyanın ayrı-ayrı şəhərlərinə ixrac olunur.
Rayondakı bağların 2251,1 hektarı intensiv, 1863,7 hektarı isə ənənəvi üsulla salınıb.
2025-2026-cı illərdə Xaçmazda daha 1 093 hektarda yeni şaftalı bağları yaradılıb. Bunun 966,3 hektarı intensiv, 126,7 hektarı ənənəvi bağlardır.
Müasir bağçılıq üsulları məhsuldarlığa da təsir edir. Ənənəvi bağlarda hektardan orta hesabla 20-25 ton, intensiv təsərrüfatlarda 30-35 ton, superintensiv bağlarda isə 40-45 ton məhsul əldə olunur.
Xaçmaz Rayon İcra Hakimiyyətinin başçısı Elnur Rzayev və Rayon Dövlət Aqrar İnkişaf Mərkəzinin mütəxəssisləri Qusarçay kəndində şaftalı bağlarına baxış keçiriblər.
Rayon rəhbəri təsərrüfat sahibləri ilə görüşərək məhsul yığımı, istehsal və satış imkanları ilə maraqlanıb. Aqrar sahənin inkişafı və fermerlərə dövlət dəstəyi məsələləri də müzakirə olunub.
Qeyd edək ki, 2025-2026-cı illərdə Xaçmazda ümumilikdə 2053 hektarda müxtəlif növ yeni bağlar salınıb. Onların 1 908,5 hektarı intensiv, 9,5 hektarı superintensiv, 135 hektarı isə ənənəvi təsərrüfatlardır.
