Qusar rayonunda "Aqrar Biznes Festivalı" və "I İntensiv Meyvə Bağları Festivalı" təşkil olunub.
Shimal.News-un məlumatına görə, tədbir Kənd Təsərrüfatı Nazirliyinin Aqrar İnnovasiya Mərkəzi və Qusar Rayon İcra Hakimiyyətinin birgə təşkilatçılığı ilə keçirilib.
Festival Qusarın Mərkəzi meydanında baş tutub. Tədbirdə fermerlər, sahibkarlar, meyvəçilik təsərrüfatları və aqrar şirkətlər iştirak ediblər.
Məlumata görə, festivalda ölkənin müxtəlif bölgələrindən 70-dən çox meyvəçilik təsərrüfatı, fermer və sahibkar təmsil olunub. Təmsil olunan təsərrüfatların bağlarının ümumi sahəsi 10 min hektara yaxın olub.
Tədbirdə intensiv bağçılıqda müasir texnologiyalar, suvarma sistemləri və dövlət dəstəyi mexanizmləri müzakirə edilib.
Hazırda ölkədə meyvəçilik təsərrüfatlarının ümumi sahəsi 50 min hektar təşkil edir. 2030-cu ilədək bu göstəricinin 70 min hektara çatdırılması hədəflənir.
Festival çərçivəsində aqrar sahədə dövlət dəstəyi mexanizmlərinə həsr olunan panel müzakirəsi də keçirilib.
