Oğuzda Zərifə Əliyeva adına parkın baxımsız vəziyyətdə olduğu bildirilir.
Bu barədə Shimal.News-a danışan sakinlərin sözlərinə görə, rayonunun girişində yerləşən bu park uzun müddətdir diqqətdən kənarda qalıb. Hazırda isə demək olar ki, yararsız vəziyyətə düşüb.
Vətəndaşlar bildirirlər ki, Oğuz şəhərində insanların asudə vaxtını keçirməsi üçün kifayət qədər şərait yoxdur. Onların sözlərinə görə, vaxtilə şəhərin ən sevimli istirahət məkanlarından biri olan parkda hazırda mərmərlər sınıb, ərazi zibillənib. Bundan başqa, parkdakı hovuzun da uzun müddətdir təmizlənmədiyi və zibillə dolduğu iddia olunur.
Zərifə Əliyeva adına parkın açılışı 16 noyabr 2011-ci ildə Prezident İlham Əliyevin iştirakı ilə keçirilib.
Sakinlər parkın yenidən abadlaşdırılmasını və ərazidə lazımi xidmətlərin göstərilməsini istəyirlər.
