1-ci Liqanın 15-ci turunda "Difa"ini qəbul edən "Zaqatala" 12-ci dəqiqədə qapısında qol görsə də, sonradan iki dəfə fərqləndi və oyunu 3 xalla başa vurdu.
Fanat.az-ın məlumatına görə, meydan sahiblərinin baş məşqçisi Rüstəm Məmmədovun qələbə ilə bağlı açıqlaması belə oldu:
"Bizim üçün ağır oyun oldu. Görünən budur ki, rəqib bizi yaxşı təhlil etmişdi. Rəqibin Kristian Kamta və Uorren Ondo kimi ön xətt oyunçuları bizə problem yaradırdı, müdafiə xətti isə hücumlarımızın inkişafına imkan vermirdi. Matçın gedişində sistemi dəyişməli olduq. İkinci hissəyə fərqli oyun planı ilə çıxdıq. Əvəzləmələrimiz uğurlu alındı və daha təhlükəli görünməyə başladıq. "Difai"nin hücumçularının matçın sonlarına yaxın yorulmaları da işimizə yaradı. Erkən qol buraxsaq da, oyunun gedişini xeyrimizə dəyişməyi və 2:1 hesablı qələbə qazanmağı bacardıq".
Qeyd edək ki, bu qələbə sayəsində xallarının sayını 21-ə çatdıran "Zaqatala" liqanın turnir cədvəlində 6-cı pillədə qərarlaşıb. 5-ci sıradakı "Şahdağ Qusar"ın da eyni xalı var.
